Imwettqa 81% tal-miżuri tal-Baġit 2023

​​​​​Ir-rata ta' implimentazzjoni kompliet titjieb minn sena għal sena skont l-aħħar statistika kkompilata mid-Direttorat tal-Implimentazzjoni fi ħdan l-Uffiċju tal-Prim Ministru

Ir-rata ta' implimentazzjoni tat-twettiq tal-baġit tas-sena 2023 kienet dik ta' 81%. Din kienet l-għola rata li qatt intlaħqet kemm ilu jsir dan l-eżerċizzju mill-2014 il-quddiem. Id-Direttorat tal-Implimentazzjoni ħa jkun qed jgħalaq 10 snin minn mindu beda jsegwi l-miżuri tal-Baġit u b'hekk riżultat bħal dan huwa inkoraġġanti u ċertifikat ta' sistema li qed topera b'suċċess.

Dan l-eżerċizzju ta' monitoraġġ juri li b'kollox din is-sena twettqu 311-il miżura li jinkludu miżuri mill-baġit 2023 kif ukoll miżuri oħrajn minn baġits passati.

Fost miżuri varji dawn jinkludu ir-rinovar u ftuħ ta' faċilitajiet sportivi, fosthom pixxina olimpika ġdida ġewwa Bormla kif ukoll l-organizzazzjoni f'Malta tal-Logħob għall-Pajjiżi Żgħar Ewropej. Miżuri oħrajn kienu jittrattaw investimenti fil-korpi dixxiplinati, fl-infrastruttura, fl-edukazzjoni u fl-anzjani, kif ukoll rinovar ta' Ċentri tas-Saħħa u investiment f'aktar mediċini b'xejn, fosthom b'assistenza lejn koppji li xtaqu l-ewwel tarbija.

Ix-xogħol li jsir mis-Servizz Pubbliku ma jsirx b'kumbinazzjoni imma b'riżultat ta' koordinament bejn d-Direttorat tal-Implimentazzjoni u dipartimenti, entitajiet u ministeri varji.

Il-pubblikazzjoni “It-Twettiq tal-Baġit 2023" fiha elenku tal-miżuri kollha li tħabbru fil-baġit 2023, fejn fuq kull miżura hemm rappurtaġġ tal-istat tagħha. Apparti minn hekk, il-pubblikazzjoni tagħti analiżi tal-andament ekonomiku u rappurtaġġ dwar l-elementi soċjali fil-baġits ta' dawn l-aħħar snin.

Link - Implementation of the 2023 Budget