IMPLIMENTATI 89% TAR-RAKKOMANDAZZJONIJIET MAGĦMULA MILL-UFFIĊĊJU TAL-AWDITUR ĠENERALI

It-tnedija tal-pubblikazzjoni Governance Action on the NAO's Annual Report on Public Accounts 2021 and other NAO Reports 2022

Ir-rata ta' azzjonijiet li twettqu mill-amministrazzjoni pubblika sabiex jiġu indirizzati n-nuqqasijiet identifikati mill-Uffiċċju tal-Awditur Ġenerali f'35 verifiki li għamel f'diversi ministeri matul is-sena 2021, laħqet il-89%.

Il-fatt li jiġu milqugħa u indirizzati r-rakkomandazzjonijiet tal-Uffiċċju tal-Awditur Ġenerali, jikkontribwixxi sew sabiex ikompli jitjieb il-livell fl-operat tal-amministrazzjoni pubblika. Mill-verifiki li saru matul l-2021, tliet entitajiet ġew rikonoxxuti li qed joperaw skont prattiċi tajba, filwaqt li f'ħames entitajiet oħra l-Uffiċċju tal-Awditur Ġeneral sab ftit li xejn nuqqasijiet.

Sabiex ikun hemm titjib kontinwu fl-operat u fil-prattiċi li tħaddem l-amministrazzjoni pubblika, id-Direttorat għal Azzjoni ta' Governanza jiffoka fuq l-oqsma l-iktar problematiċi, bħal ma huma aderenza mal-proċeduri tax-xiri pubbliku, iż-żamma ta' dokumentazzjoni skont il-ħtieġa, tibdil meħtieġ fi proċeduri ambigwi, antikwati u ineffettivi, il-bżonn ta' rikonċiljazzjoni u ċertifikazzjoni ta' dokumenti b'mod regolari, kif ukoll segregazzjoni tad-dmirijiet.

Fil-pubblikazzjoni Governance Action on the NAO's Annual Report on Public Accounts 2021 and other NAO Reports 2022, wieħed isib elenku tal-verifiki li saru mill-Uffiċċju tal-Awditur Ġenerali fl-2021 fid-diversi ministeri, rendikont tar-rakkommandazzjonijiet magħmula, u l-azzjonijiet meħuda jew proposti mill-ministeri sabiex jiġu indirizzati n-nuqqasijiet eżistenti.

Link: Governance Action on the NAO's Annual Report on Public Accounts 2021 and other NAO Reports 2022