Konferenza Mid-Direttorat Għal Azzjoni Ta’ Governanza u Mid-Direttorat Għall-Implimentazzjoni

Fid-9 ta' Mejju 2024, id-Diviżjoni għall-Koordinazzjoni u l-Implimentazzjoni nediet programm ta' sensibilazzjoni mal-ministeri sabiex id-Direttorat għal Azzjoni ta' Governanza jagħti għarfien dwar prattiċi ta' governanza tajba addotati fil-ministeru konċernat, sabiex jiġu ndirizzati nuqqasijiet li jkunu ġew identifikati mill-istituzzjonijiet ta' sorveljanza.

L-ewwel minn din is-sensiela ħadet forma ta' konferenza bit-tema 'Governance in Action', u saret mal-kapijiet fi ħdan il-Ministeru għall-Edukazzjoni, Sport, Żgħażagħ, Riċerka u Innovazzjoni. Fetaħ il-konferenza s-Segretarju Permanenti, is-Sur Matthew Vella. Wara  indirizza l-konferenza id-Direttur Ġenerali Koordinazzjoni u Implimentazzjoni, is-Sur Oreste Cassar, fejn ta ħarsa ħafifa lejn l-irwol ta' kull direttorat li jaqa' fid-Diviżjoni tal-Koordinazzjoni u l-Implimentazzjoni.

Kien imiss imbagħad lid-Direttur Azzjoni ta' Governanza, is-Sa Jacqueline Bonnici, li spjegat l-obbligu li kull impjegat pubbliku għandu li jirrikonoxxi lill-istituzzjonijiet ta' sorveljanza u li tittieħed azzjoni f'waqtha biex jitwettqu r-rakkomandazzjonijiet mogħtija minnhom. Spjegat ukoll kif bl-adozzjoni tal-prinċipji ta' governanza tajba tonqos il-frekwenza li istituzzjonijiet ta' sorveljanza jsibu nuqqasijiet fl-operat tal-Amministrazzjoni Pubblika, kif ukoll jonqsu l-ilmenti mill-pubbliku għax ikun qed jingħata servizz aħjar.

Wara l-Assistent Direttur Azzjoni ta' Governanza, is-Sa Angela Portelli, spjegat l-importanza ta' komunikazzjoni kontinwa bejn l-entità konċernata, is-Segretarju Permanenti u l-istituzzjonijiet ta' sorveljanza, kif ukoll azzjoni immedjata u effettiva; dan bl-għajnuna tal-Liaison Officers u Focal Persons rispettivi.

It-tieni parti tal-konferenza ġiet indirizzata mid-Direttur għall-Implimentazzjoni tal-Proġetti, is-Sur Aaron Abdilla, fejn spjega kif id-Direttorat għall-Implimentazzjoni jimmoniterja u jassisti kontinwament lill-Ministeri u l-Entitajiet Pubbliċi fl-implimentazzjoni tal-miżuri tal-baġit tal-Gvern sabiex dawn iwettqu l-proġetti tagħhom bl-iktar mod effettiv u effiċjenti possibbli. Wara kompla billi tkellem fuq il-progress tal-miżuri li jirrelataw mal-Ministeru għall-Edukazzjoni, Sport, Żgħażagħ, Riċerka u Innovazzjoni. Is-Sur Abdilla saħaq fuq kif dan il-proċess kollu jsir sabiex il-Gvern jipprovdi servizz t'eċċellenza fil-waqt illi jassikura l-akkontabilita', it-trasparenza, u l-koordinazzjoni.

Min-naħa tiegħu, l-Assistent Direttur tal-Implimentazzjoni tal-Proġetti, is-Sur Andrew Micallef, spjega il-proċess sħiħ li jseħħ kull sena u li jibda mill-għada tad-Diskors tal-Baġit sal-pubblikazzjoni finali fuq l-implimentazzjoni tal-miżuri li jiġi ppreżentat lis-Segretarju Permanenti Ewlieni qabel ma jiskatta l-perjodu tal-Baġit li jmiss