l-Uffiċċju għall-Koordinazzjoni tal-Ispezzjonijiet nieda l-ewwel forum tiegħu.

Fil-31 t'Ottubru 2024, l-Uffiċċju għall-Koordinazzjoni tal-Ispezzjonijiet nieda l-ewwel forum tiegħu. Din il-pjattaforma sservi ta' opportunita' tajba għat-timijiet maniġerjali ta' diversi entitajiet governattivi involuti fl-ispezzjonijiet biex jiltaqgħu flimkien, jiskambjaw għarfien u esperjenzi, u jindirizzaw l-isfidi. Hija opportunita' fejn jiġu kondiviżi soluzzjonijiet għal kwistjonijiet li oħrajn setgħu diġa' solvew jew, alternattivament, li jiġu indirizzati b' mod kollaborattiv l-isfidi komuni u jiġu identifikati modi effettivi għall-futur.

It-tema magħżula għal dan l-ewwel forum kienet “L-Importanza tad-Dejta." Fid-dinja tal-lum, fejn id-dejta tiswa mitqlu deheb, it-teħid ta' deċiżjonijiet xprunati mid-dejta huwa essenzjali biex jinkisbu l-aħjar riżultati. L-aċċess għal dejta preċiża, meta tiġi interpretata b'mod korrett, iwassal għal għarfien azzjonabbli li jista' jinforma l-istrateġiji, isolvi kwistjonijiet u jtejjeb il-proċessi.

Qed nippjanaw li norganizzaw fora oħra fiż-żmien li ġej biex inkomplu nsaħħu l-kollaborazzjoni fost id-diversi entitajiet. Dan l-objettiv jista' jintlaħaq biss billi nifhmu aktar il-ħidma ta' xulxin, nallinjaw il-proċeduri tagħna, u nżidu l-komunikazzjoni bejnietna. Dawn il-fora jista' jkollhom rwol kruċjali biex insaħħu dan kollu.