PROMPT - Sistema Ġdida għas-Servizz Pubbliku għar-Rappurtar u l-Monitoraġġ tal-Programmi u l-Miżuri tal-Gvern

​Id-Direttorat għall-Implimentazzjoni sejjaħ ir-raba' Focal Point Forum. Matul il-Forum ġie introdott il-PROMPT. Pjattaforma ġdida għall-monitoraġġ tal-proġetti tas-Servizz Pubbliku. Din is-sistema ġiet żviluppata mill-MITA għad-Diviżjoni għal-Koordinazzjoni u l-Implimentazzjoni fi ħdan l-Uffiċċju tal-Prim Ministru, PROMPT hija mistennija li tissostitwixxi s-sistema eżistenti mgħarufa bħala MEIS. Din il-pjattaforma innovattiva hija mfassla biex ittejjeb ir-rappurtar u l-monitoraġġ tal-programmi u l-miżuri tal-Gvern, dan filwaqt li tiġi żgurata dejjem aktar l-akkontabilità u t-trasparenza.

Il-karatteristiċi avvanzati ta' PROMPT għandhom l-għan li jissimplifikaw il-proċessi tal-monitoraġġ tal-implimentazzjoni tas-Servizz Pubbliku. Is-sistema toffri wkoll flessibbiltà biex potenzjalment tipprovdi għall-onboarding ta' utenti oħra, u b'hekk ikun immassimizzat l-investiment u s-sostenibbiltà. Permezz ta' din il-pjattaforma s-servizz pubbliku qiegħed iżid l-isforzi lejn id-diġitalizzazzjoni u l-modernizzazzjoni tiegħu. Il-PROMPT ser tippermetti lis-Servizz Pubbliku jiġbor dejta komprensiva dwar l-implimentazzjoni tal-proġetti, filwaqt li jiffaċilita t-teħid ta' deċiżjonijiet ibbażati fuq l-evidenza. ​

Il-forum, li sar fis-26 u t-30 ta' Settembru, kien maqsum f'żewġ partijiet. L-ewwel parti kienet tinkludi dimostrazzjoni tal-użu tas-sistema. It-tieni parti kienet tinkludi workshop fejn il-Focal Points kellhom l-opportunità jaħdmu fuq is-sistema l-ġdida. It-tim tal-MITA attenda ż-żewġ sessjonijiet, u pprovda sapport u gwida.