Tibda l-ħidma fuq il-Baġit 2023

Is-Servizz Pubbliku beda l-ħidma tiegħu biex il-miżuri tal-Baġit 2023 ippreżentati t-Tnejn li għadda, jitqassmu bejn il-Ministeri rispettivi u minnufih tibda l-implimentazzjoni tagħhom.

Għal kull miżura jitħejja pjan ta’ azzjoni, b’dettalji dwar kif il-miżura se tkun qed tiġi fis-seħħ. Sussegwentament, id-Direttorat tal-Implimentazzjoni tas-Servizz Pubbliku jibda jsegwi l-progress b’mod regolari, u jibda jsir rappurtaġġ li perjodikament jittella’ wkoll għall-konsiderazzjoni tal-kabinett tal-Ministri.

Dan jassigura li dak li jkun imwiegħed fid-diskors tal-baġit verament jitwettaq. Fil-fatt, fl-aħħar snin is-Servizz Pubbliku dejjem kellu rati ta’ twettiq ta’ miżuri b’saħħtu, b’rapport dettaljat dwar l-implimentazzjoni jiġi ppubblikat kull sena f’Ottubru, aċċessibbli wkoll mis-sit tas-Servizz Pubbliku. Ta’ min isemmi li miżuri pendenti minn baġits preċedenti jibqgħu taħt il-lenti sakemm jitwettqu wkoll.

Is-Servizz Pubbliku jagħmel ukoll eżerċizzju biex kull miżura tal-baġit tiġi allinjata mal-miri tal-iżvilupp sostenibbli (SDGs). F’dan l-ambitu, Malta ġiet klassifikata bħala t-33 l-aħjar pajjiż minn madwar 165 pajjiż.